ආයුබෝවන් !

සංචාර.lk වෙබ් අඩවියේ පරමාර්ථය වෙන්නේ ලොව නොයෙකුත් රටවල ප්‍රසිද්ධ එමෙන්ම සංචාරක වැදගත්කමක් ඇති ස්ථාන ගැන ඔබට හඳුන්වා දීම.  ඒ පරමාර්ථය ඉෂ්ට කර ගන්න මුලික පදනම අපි සංචාරය කල රටවල වල විස්තර වලින් ආරම්භ කලොත් හොඳයි කියලා මට හිතුනා.

 

පසුගිය වසර 20 ඇතුලත රටවල 50 ක පමණ සංචාරයේ යෙදෙන්නට අපිට හැකි වුනා. ඒ රටවල වලදී අපි ලබපු අත්දැකීම්, විස්තර සහ, දුටු දේවල් සහ හමුවුණු නොයෙක් පුද්ගලයින් සම්බන්ධව විස්තර මේ වෙබ් අඩවියෙන් ඉදිරිපත් කරන්නට මම උත්සාහ ගන්නවා.

 

ශ්‍රී ලාංකිකයන් වශයෙන් අපිට බොහෝ රටවල් වල සංචාරය කරන්නට වැඩි අවස්ථාවන් නැති වුනත් මේ වෙබ් අඩවියෙන් ඒ රටවල් වල හදවතින් සංචාරය කරන්න ඔබ සැමට ආරාධනා කරනවා.

 

සෑම සංචාරයකින්ම පසුව මම ලෝකය දිහා අලුත් විදිහකට බලන්න පුරුදු වුනා.  නැගෙනහිර   අප්‍රිකාවේ කෙන්යාවේ නයිරෝබි නගරයේ සිට රටවල් හතක් හරහා, කෙන්යාව, උගන්ඩාව, රුවන්ඩාව, කොංගෝ රාජ්‍යය, බුරුන්ඩි සහ ටැන්සානියාව යන රටවල් හරහා එකවර සංචාරයක යෙදෙන්නට මට අවස්ථාව ලැබුනා. අප්‍රිකානු රටවල් ගැන අප්‍රිකානුවන් ගැන අලුත් විදිහකට සිතන්න මම පටන් ගත්තේ මේ සංචාරයෙන් පසුව.  ඉන්දියාවේ චෙන්නායි සිට   කොචීන් දක්වා මෝටර් රථයකින් ගමන් කරන්නට අපිට හැකි වුනා.  එහිදී  මට අපි වෙනදා නොදකින නොපුරුදු ඉන්දියාවක් දැක ගන්නට ලැබුනා.  නවසීලන්තයේ උතුරු කොනේ සිට දකුණු කෙළවර දක්වා කල සංචාර, තුර්කිය හා ඉරානය හරහා ගමන් කරමින් කල සංචාර, ඊජිප්තුව, සුඩානය, මොරොක්කෝව වගේ රටවල් වල  කල සංචාර ජීවිතයේදී කවදාවත්  අමතක වෙන්නේ නැහැ. ඒ ආශ්වාදය අත්දැකීම් ඔබත් එක්ක බෙදා ගැනීම තමයි මගේ අභිප්‍රාය.

 

මේ අත්දැකීම් කවදා හෝ කෙදිනක හෝ කොහේදී හෝ කවරෙකුට හෝ ප්‍රයෝජනවත් වේවි.

 

ලෝකයේ සෑම රටකටම සෑම ජාතියකටම ආදරය කරන්න, සෑම ආගමකටම ගෞරවය දක්වන්න අපි අවට ඇති පරිසරයට ආදරය කරන්න අපිට පුළුවන් වෙන්නේ අපේ උරුමයන් ගැන වගේම වෙනත් රටවල් ගැනත් අවබෝධයක් තිබෙනවා නම් විතරයි. මේ වෙබ් අඩවියෙන් ඒ සඳහා ඔබට යම් රුකුලක් ලැබෙනවා නම් අපේ පැතුමත් එයයි.  

 

රොහාන් ඩිරෙක්ස් - කාත්‍යා ඩිරෙක්ස් 

rohandx@hotmail.com 

  • KRISTY ANNAH - Kenya

    කෙන්යාවේ නයිරෝබි නගරයේ ඉපදුනු ක්‍රිස්ටි කෙන්යාවේ සෑම අඟලකම පාහේ සංචාරය කර ඇත. කෙන්යාවේ නයිරෝබි විශ්ව විද්‍යාලයෙන් උසස් අධ්‍යාපනය ලබා සංචාරක මාර්ගෝපදේශකයෙක් ලෙස දැනට වසර 10ක් පමණ කටයුතු කරන ක්‍රිස්ටි කෙන්යානු සෆාරි සංචාර සම්බන්ධයෙන් විශේෂ පුහුණුවක් ලබා ඇති අතර  ඇය සතුව ඔබ වෙනුවෙන්ම සකස් කරන ලද පෞද්ගලික සහ කණ්ඩායම් සංචාර වැඩ සටහන් විශාල ප්‍රමාණයක් ඇත. ඔබ කෙන්යාවේ සංචාරය කරන්නේ නම් හෝ ඔබට කෙන්යාව සම්බන්ධයෙන් කරුණු දැන ගැනීමට අවශ්‍ය නම් ඇය ඒ සඳහා සුදානම්ය.

  • RITA YU - China

    චීනය ශ්යාන්ශ්යාට්සේ නගර ආසන්න පිහිටා ඇති ලොව විශ්මයජනක ජාතික වනෝද්‍යානය නැරඹීමට යන්නේ නම් රීටා ගේ සහයෝගය අතිශයින් ප්‍රයෝජන වේ. එහි විශ්ව විද්‍යාලයේ පශ්චාත් උපාධිය හදාරන ඇය විදෙස් සංචාරකයින් හට මඟ පෙන්වීම සිදු කරන්නේ විනෝදාංශයක් වශයෙනි. අවතාර් කඳු වැටිය නමින් හඳුන්වන මේ ජාතික වනෝද්‍යානයේ සෑම ගසක් ගලක්ම හොඳින් හඳුනන රීටා ඉංග්‍රීසි සහ රුසියානු භාෂාවඳ හොඳින් හසුරුවන මඟ පෙන්වන්නියකි. 

  • ERMIAS NEGUSSIE - Ethiopia

    ඉතියෝපියාවේ මගේ සියලුම සංචාර සංවිධානය කලේ එර්මියාස්. විශේෂයෙන්ම ඉතියෝපියාවේ දකුණු ප්‍රදේශයේ සහ ගෝත්‍රිකයින් වෙසෙන ප්‍රදේශ වල සංචාර සඳහා ඔබ යන්නේ නම් එර්මියාස් ගේ සේවය ලබා ගත හැකියි. ඉංග්‍රීසි භාෂාව හොඳින් හසුරුවන එර්මියාස් තමන්ගේම සංචාරක ආයතනයක අයිතිකරු වනවා. 

  • BARAKA BRACHAHARBE - Rwanda

    අප්‍රිකාවේ දිදුලන රාජ්‍යය වන්නේ රුවන්ඩාවයි. රුවන්ඩා රත්රන් ගොරිල්ලා සංචාර උපදේශකයෙකු වන බරකා කිගාලි රාජ්‍ය විශ්ව විද්‍යාලයේ  සංචාරක කළමනාකරණය පිළිබඳව හදාරා ඇත. පෞද්ගලික සහ කුඩා සංචාරක කණ්ඩායම් හසුරුවන ඇය හොඳින් ඉංග්‍රීසි භාෂාව සසුරුවන නිසා විදේශ සංචාරකයින් වැඩි දෙනෙකුගේ අවධානය යොමු කර ගැනීමට සමත් වී ඇත. නැගෙනහිර අප්‍රිකා රටවල් කිහිපයක සංචාරය කර ඇති බාරකා හට බුරුන්ඩි, කොංගෝ සහ ටැන්සානියාවේද සංචාර සංවිධානය කිරීමට හැකියාව ඇත.

  • MARIA ESTHER - Bolivia

    මාරියා එස්තර් මා හට මුන ගැසුනේ බොලීවියාවේදී. ඇය වලෙග්‍රන්දා නගරයේ චේ ගුවේරා කේන්ද්‍රයේ උපදේශිකාවක් සහ සංචාරක මඟ පෙන්වන්නියක්. ඉතා හොඳින් ඉංග්‍රීසි භාෂාව හසුරුවන ඇය "චේ ගුවේරා ගිය පාරේ" මගේ සංචාරය වෙනුවෙන් මා සමග වලෙග්‍රන්දා නගරයේ සිට චේ ගුවේරා ඝාතනයට ලක්වුණු ලා හිගුරා ගම්මානය වෙත පැමිණ අවශ්‍ය විස්තර මා හට ලබා දුනි. 

    ​ඔබ බොලීවියාවේ වලෙග්‍රන්දා නගරය වෙත සංචාරය කරන්නේ නම් ඇයගේ සංචාරක සේවය ඔබ වෙනුවෙන් විවෘතව පවතී.

  • GERMAN SANDRIN - Russia

    රුසියාවේ උත්තර ධ්‍රැව කලාපයේ සලිහාර්ඩ් නගරයේ යමාල්ටුර් ආයතනයේ සේවය කරන ගෙර්මාන් සමග සලිහාර්ඩ් නගරය සහ ඒ කලාපයේ ජීවත් වන නෙනේට්ස් ජනතාවගේ ජීවන තත්වයන් සම්ප්‍රදායයන් ගැන අධ්‍යයනය කරන්නට මට අවස්තාව සැලසුණා. නෙනේට්ස් ජන කණ්ඩායම නියෝජනය කරන ගෙර්මාන් හට ඒ පිලිබඳ ඇත්තේ හසල දැනීමක්.

  • LOAN NGUYEN(LARA)-Vietnam

    ලාරා මා හට හමුවුනේ වියට්නාමයේ හැනෝයි නගරයේදී. හැනොයි නගරයේ සෑම අස්සක් මුල්ලක් නෑරම මට පෙන්වුයේ ලාරා. වියට්නාමයේ හැනොයි නගරයේ රාජ්‍ය විශ්ව විද්‍යාලයේ Hospitality and Tourism හදාරා දැනට OneTrip with Local - ආයතනයේ මඟ පෙන්වන්නියක් ලෙස කටයුතු කරන ලාරා හොඳින් ඉංග්‍රීසි භාෂාව හසුරවනවා. මා විසින් ඉදිරිපත් කල සංචාර with Rohan Direkz වැඩ සටහනේ වියට්නාම් සාම්ප්‍රදායික ආහාර ගැන වැඩි වශයෙන් කරුණු ඉදිරිපත් කලේ ලාරා.

  • NYAMA BAYANTUR - Mongolia

    මොන්ගෝලියාවේ සංචාරයකට යනවානම් මොහු සමගයි යා යුත්තේ. අමතක කල නොහැකි පුද්ගලයෙක්. මොන්ගෝලියාවේ කි.මී.5000ක දුරක් මොහුගේ රුසියානු බුහාන්කා වාහනයෙන් ගිය ගමන ජීවිතයේ කිසිම දිනෙක අමතක කරන්න අපහසුයි. මොන්ගෝලියානු සාම්ප්‍රදායික ජන ජීවිතය පිලිබඳ හසල දැනීමක් මෙන්ම අති දක්ෂ රියදුරෙක් වන මොහු ගේ දායකත්වය නිසාම තමයි මගේ සංචාර with Rohan Direkz වැඩ සටහනේ මොන්ගෝලියානු චාරිකාවේ විස්තර ඔබ වෙතට ගෙන එන්නට හැකි වුනේ. 

  • ENOS-ROSALINA HOME STAY - Indonesia

    ඉන්දුනීසියාවේ සුලාවෙසි දුපතේ ටෝරාජා ජනතාව ජීවත් වන රන්ටෙපෝ නගරයේ Rosalina Home Stay ආයතනයේ හිමිකරු. මගේ ටෝරාජා සංචාරයේදී අතිශය වැදගත් සාම්ප්‍රදායික කරුණු සහ විවිධ ටෝරාජා ජාතිකයින් සමග කතා බස කිරීමට මට අනගි සහයෝගයක් ලබා දුන්නේ ඊනොස්. එමෙන්ම මා හට නවාතැන් පහසුකම් ලබා දුන්නේද ඊනොස්. ඔබට සුලාවෙසි දුපතේ සංචාරයක් සඳහා යන්නේ නම් අවශ්‍යම පුද්ගලයෙක් ඊනොස්.

  • ALYONA TRUBNYAKOVA - Russia

    උෂ්ණත්වය සේ.ග්‍රේ. අංශක රින 55ක දී මා සමග ලොව මිනිසුන් ජීවත්වන ශීතම ප්‍රදේශයේ සංචාරය කලේ අල්යෝනා. සයිබීරියානු පරිසරයට ආදරය කරන අල්යෝනා හමු නොවන්නට සංචාර with Rohan Direkz වැඩ සටහනේ පළමුවන සහ දෙවන වැඩ සටහන් ඉදිරිපත් කිරීමට අපහසු වන්නට ඉඩ තිබුනා. ඉංග්‍රීසි සහ ජර්මානු භාෂාව විශිෂ්ට ලෙස හසුරුවන අල්යෝනා ගවේශනාත්මක සංචාරකයෙකුට නම් මහඟු උපකාරයක්.

 www.සංචාර.lk   (www.sanchara.lk)

ඔබගේ අදහස් මේ ඊ-මේල් ලිපිනයට යොමු කරන්න. rohandx@hotmail.com