top of page
ගවේෂණ
චේ ගුවේරා ගිය පාරේ - 2
සංචාර බොලීවියාවේ
Travel to Bolivia
  • Facebook - Black Circle
  • Google+ - Black Circle
  • YouTube - Black Circle

Rohan Direkz 

​සංචාරය කලේ 2018 මැයි 12-22 

rohandx@hotmail.com

සමාජවාදී ලෝකයක් ගොඩ නැගීම සඳහා මියෙන තුරුම නොනිමි අරගලයක නිරත වූ අසහාය විප්ලවීය චරිතය වන අර්නෙස්ටෝ චේ ගුවේරා පිලිබඳ සිංහල බසින් සටහන් ව ඇති බොහෝ ලිපි ලේඛන වෙති.  ඒවා සියල්ලම විදේශීය ලිපි ලේඛන මුලාශ්‍රයෙන් පරිවර්තනය වූ ඒවා විනා චේ ගුවේරා පිලිබඳ සජීවී සාක්ෂි මත සෘජුවම සැකසුනු ලේඛනයන් නොවේ. එහෙත් රොහාන් ඩිරෙක්ස් නමැති අපුරු ගවේෂණශීලී සංචාරකයා www.sanchara.lk වෙබ් අඩවිය සහ දිවයින ඉරිදා සංග්‍රහය සමග බොලීවියාවේ සහ කියුබාවේ කල සංචාරයන් ඇසුරෙන් පෙළ ගැසෙන මෙම ලිපි පෙළ එම කඩ ඉම ඉක්මවාලයි. එය වඩාත් සුවිශේෂී වන්නේ දැනට ජීවත්ව සිටින චේ ගුවේරාගේ සමීපතමයන් සහ ඔහුගේ අවසන් කාලයේ ඔහු අසල සිටි සුවිශේෂ චරිත කිහිපයක සජීවී සාක්ෂි ආශ්‍රයෙන් මෙම ලිපි පෙළ සටහන් වන බැවිනි.       -      තිස්ස ගුණතිලක 

මම ඔබව රැගෙන යන්නම් බොලීවියාවේ හිටපු හමුදා නිලධාරියෙක් වන ගැරී ප්‍රාඩෝ වෙතට. චේ ගුවේරාගේ මරණය කෙසේද සිදු වුනේ මාධ්‍ය වාර්තා සත්‍යද අසත්‍යද ? ඔබටත් මටත් තිබෙන බොහෝ ප්‍රශ්න වලට විසඳුම් ගැරී ප්‍රාඩෝ ළඟ තිබෙනවා. 

චේ ගුවේරා ගිය පාරේ - On the Trail of Che Guevara

ගැරී ප්‍රාඩෝ බොලීවියාවේ සැන්ටා කෘස් නගරයේ විශ්‍රාමිකව ජීවත් වෙනවා. ඔහුව හමු වන්නට ලෙහෙසි පහසු නැහැ. ඒ මොකද ඔහු දැන් නිවාස අඩස්සියේ සිටින්නේ. දැනට බොලීවියාවේ පවතින රජයට එරෙහිව ක්‍රියාකරන බවට චෝදනා ඔහුට එල්ල වී තිබෙනවා. එමෙන්ම ඒ වෙනුවෙන් දැනට නඩු විභාගද පැවැත්වෙනවා. 

චේ ගුවේරා ගිය පාරේ - On the Trail of Che Guevara

කවුද මේ ගැරී ප්‍රාඩෝ.

ඇමෙරිකා එක්සත් ජනපදයේ යුධ හමුදා පුහුණුව ලැබූ ගැරී ප්‍රාඩෝ 1967 ඔක්තෝබර් මස 8 වැනිදා බොලීවියාවේ වලෙග්‍රන්දා ගම්මානයේදී චේ ගුවේරා අත් අඩංගුවට ගත් රේන්ජර්ස් හමුදා කණ්ඩායමේ නායකයා විය.  1978-79 වසර වලදී ඔහු බොලීවියාවේ ක්‍රම සම්පාදන සහ සම්බන්ධීකරණ අමාත්‍යවරයා ලෙස සේවය කර ඇත.

ගැරී ප්‍රාඩෝව හමු වන්නට මට මාස කිහිපයක් අන්තර් ජාලය හරහා ඔහුගේ පුතා සමග අදහස් හුවමාරු කර ගන්නට සිදුවුනා. ඔහුගේ පුතා සැන්ටා කෘස් නගරයේ ප්‍රසිද්ධ නීතීඥ වරයෙක්. කෙසේ හෝ ගැරී ප්‍රාඩෝ කැමති වුනා මා සමග කතා බස් කරන්නට අවසරයක් ලබා දෙන්නට. අවසානයේදී මට සිදුවුනේ බොලීවියාවට පැමිණි දිනයේම ගුවන් තොටුපොළේ සිට ගැරී ප්‍රාඩෝ ගේ නිවසට යාමට. 

​ගැරී ප්‍රාඩෝ අද ආබාධිතයෙක්. චේ ගුවේරාගේ මරණයෙන් ටික කලකට පසුව හමුදා කඳවුරක් තුල ඇතිවූ වෙඩි තැබීමකින් බරපතල තුවාල ලත් මොහු අද රෝද පුටුවක් ආධාරයෙන් තමයි ගමන් කරන්නේ. 

ගැරී ප්‍රාඩෝ - චේ ගුවේරා අත් අඩංගුවට ගැනීමට දිනකට පෙර ලා හිගුරා ගම්මානයේදී 

​ජායාරුප අනුග්‍රහය - Gral. Div. (r) Gary Prado Salmon-La Guerrilla Inmolada

"ඇත්තටම එදා 1967 ඔක්තෝබර් මාසේ  8 වැනිදා සිදුවුනේ මොකක්ද?" මම ගැරී ප්‍රාඩෝ සමග කතාව ආරම්භ කළා.

චේ ගුවේරා ගිය පාරේ On the Trail of Che Guevara
චේ ගුවේරා ගිය පාරේ - On the Trail of Che Guevara

මේ චේ ගුවේරා සහ සිමොන් බොලිවියානා අත් අඩංගුවට පත් වූ අවස්තාවේදී ගත් ජායාරුප

​ජායාරුප අනුග්‍රහය - Gral. Div. (r) Gary Prado Salmon-La Guerrilla Inmolada

"ඔක්තෝබර් මාසේ 8 වැනිදා මගේ සෙබළුන් පිරිසක් ලා හිගුරා ගම්මානයට යාබද ප්‍රදේශයේ මුර සංචාරයේ යෙදී සිටියා. මේ ප්‍රදේශය ගල් කුළුණු සහ විශාල ගස් වලින් සමන්විත දුෂ්කර ප්‍රදේශයක්. දහවල් 1ට පමණ මාගේ සොල්දාදුවන් කෑ ගසනවා මට ඇහුනා පුද්ගලයින් දෙදෙනක් අල්ලා ගත් බව කියමින්. මම එවෙලේම ඔවුන් වෙතට දිව ගියා." ගැරී ප්‍රාඩෝ තම මතකය අවධි කරමින් කතාව ආරම්භ කළා.

"අල්ලා ගත් පුද්ගලයන් දෙදෙනාගෙන් එක් අයෙක් බොලීවියානු ජාතිකයෙක් නොවන බව ඔවුන්ව දුටු විටම මට අවබෝධ වුනා. ඔවුන් දෙදෙනාම අතේ රයිෆල් තුවක්කු තිබුනා."


"මා මුලින්ම කලේ ඔවුන්ගේ අතේ තිබෙන ආයුධ ඉවත් කිරීමට අන දීමයි. මගේ අණට අවනත වූ ඔවුන් දෙදෙනා තම ආයුධ බිම දැමුවා. 
උඹලා කවුද ? ඔහු කවුද කියා මට ඉවෙන් මෙන් දැනුනත් මම ඔවුන් අතර සිටි උස එමෙන්ම බොලීවියානු නොවන ජාතිකයාගෙන් ඇසුවා. 
“මම චේ ගුවේරා” ඔහු පහත් හඬින් උත්තර දුන්නා."  


අනික් පුද්ගලයා සිමොන් විලී (බොලීවියානු ගරිල්ලා භටයෙක්)


"ඒ කාලයේ කට කථා පැතිරෙමින් තිබුනා චේ ගුවේරා වගේ පුද්ගලයින් කිහිප දෙනෙක් මේ ප්‍රදේශයේ සැරි සරණ බව. ඒ නිසා මට අවශ්‍ය වුනා මේ සැබෑ චේ ගුවෙරාදැයි දැන ගන්න. මම ඇසුවා චේ ගෙන් ඔබගේ දකුණු අත පෙන්වන්න කියා, මට ලැබී තිබුණු විස්තර අනුව නියම චේ ගුවේරාගේ දකුණු අතේ පිට පැත්තේ විශාල සීරීම් කැළලක් තිබිය යුතුව තිබුනා.  ඒ සීරීම් කැළල ඒ ආකාරයෙන්ම තිබුනා."

කැප්ටන්ගැ ගැරී ප්‍රාඩෝ සඳහන් කරන අන්දමට චේ ගුවේරා ඇතුලු කණ්ඩායම ලා හිගුරා ඝන වනාන්තරයට පැමිණ ඇති බව දැන ගත්තේ ගැමි කාන්තාවක් දුන් ඔත්තුවකින්. 

චේ ගුවේරා ගිය පාරේ On the Trail of Che Guevara

මේ චේ ගුවේරා 1964 වසරේ හවානා නගරයේදී  ජායාරුපය Elliott Erwitt in Havana in 1964 © Elliott Erwitt / Magnum Photos

"චේ ගුවේර දිහා බැලුවම මට පෙනුනේ නැහැ ඔහු ජායාරුප වල මා දැක තිබු විදිහට. මම දැක්කේ ඉතා දුකට පත්, වැරහැලි ඇඳ ගත් , කොණ්ඩය සහ රැවුල වැවුන අපිරිසිදු දුර්ගන්ධය හමන පුද්ගලයෙක්. ඔහු මාස ගණනක් තිස්සේ කැලෑවේ සිටින්නට ඇති."


"ඔහු තම යුනිෆොර්මයට පිටින් තවත් නිල් පැහැති ජැකට්ටුවක් පැළඳ සිටියා. ඒ ජැකට්ට්ටුවේ බොත්තම් දක්නට ලැබුනේ නැහැ. ඔහු සපත්තු පැළඳ සිටියේ නැහැ. සතුන්ගේ හම් වලින් කකුල් ඔතා සපත්තු වශයෙන් සාදා ගෙන තිබුනා. ඒවා සියල්ල කැඩී බිඳ ගොස් තිබුනා. ඔහුගේ එක් කකුලක තිබුනේ අපිරිසිදු නිල් පැහැති මේස්. අනික් කකුලේ රතු පැහැති මේස් . ඔහු ගේ පෙනුම හරියට පාරේ හිඟා කන වැරහැලි ඇඳ ගත් අපිරිසිදු පුද්ගලයෙක් වාගේ මට පෙනුනේ. මා දුටුවා ඔහු අතේ බොහොම පරිස්සමින් ආරක්ෂා කර ගත් ඇලුමිනියුම් පෙට්ටියක් තිබුනා. එහි බිත්තර 6ක් තිබුනා. එයින් මා අවබෝධ කර ගත්තා කවුරුන් හෝ ගම් වැසියෙක් ඔහුට උදව් කල බව." 

චේ ගුවේරා ගිය පාරේ - On the Trail of Che Guevara
චේ ගුවේරා ගිය පාරේ - On the Trail of Che Guevara

මේ චේ ගුවේරා ගේ විනාශ වූ රයිෆල් තුවක්කුව සහ ගැරී ප්‍රාඩෝ ගේ හමුදා කණ්ඩායම 

​ජායාරුප අනුග්‍රහය - Gral. Div. (r) Gary Prado Salmon-La Guerrilla Inmolada

"චේ ගේ දකුණු කකුල තුවාල වී ලේ වැක්කෙරෙමින් තිබුනා. ඒ ප්‍රදේශයේ මාගේ සෙබළුන්ට මා  මැෂින් තුවක්කුවකුත් 60mmමෝටාර් අවියකුත් ලබා දී තිබුනා. සෙබළුන් චේ ට  වෙඩි තබා තිබුනා. ඒ නිසා තමයි ඔහුගේ කකුල තුවාල වී තිබුනේ. එට අමතරව තවත් වෙඩිල්ලක් හරියටම ඔහුගේ අවියට වැදී තිබුනා. ඒ නිසා ඔහු ගේ අතේ තිබු අවියත් විනාශ වී තිබුනා." 

"ඔබගේ සාමාජිකයින් මගේ රයිෆල් එකත් විනාශ කළා" චේ තරමක් උස හඬින් පැවසුවා."

"කොයි වෙලාවේදීද මේක සිද්ධ වුනේ."

"කන්ද පාමුලදී. මටත් තුවාලයි. මම හිතනවා ඔබ මාව මරන්නේ නැහැ කියලා. පන පිටින් මාව වටිනවා ඔබට. හැබැයි අපි නම් තුවාල වෙච්ච සිරකරුවන්ට හොඳට සැලකුවා." චේ ගේ මේ පිළිතුර මම බලාපොරොත්තු වුනේ නැහැ." 


චේ මගෙන් වතුර ඉල්ලා සිටියා. ඔහුගේ ළඟ වතුර බෝතලයක් තිබුනා. නමුත් මාගේ වතුර බෝතලයෙන් වතුර බොන්නට මා ඉඩ දුන්නා. එයට හේතුව මා සිතුවා ඔහුගේ වතුර පානය කලොත් සමහර විට සිය දිවි නසා ගන්නට ඒවාට වස මොශ්‍ර කොට ඇතැයි කියා. මම සිගරට් කිහිපයකුත් චේ ට ලබා දුන්නා. 

චේ ගුවේරා ගිය පාරේ - On the Trail of Che Guevara

චේ ගුවේරා තම දිනපොත , මුදල් පොකැට්ටුව සහ අනිකුත් පෞද්ගලික උපකරණ දමා තිබුනේ මේ බෑගයේ

ජායාරුප අනුග්‍රහය - Gral. Div. (r) Gary Prado Salmon-La Guerrilla Inmolada

ගැරී ප්‍රාඩෝ තව දුරටත් කරුණු පැහැදිලි කළා. "චේ ළඟ තිබු සියලුම දේවල් මා භාරයට ගත්තා. ඔහුගේ දිනපොත, මුදල්, පොකට්ටුව, ගමන් මල්ල ඒ අතර තිබුනා. ඒවා ගනිද්දී ඔහු කිසිම විරුධතාවයක් දැක්වුයේ නැහැ. ඔහු ළඟ පිස්තෝලයක් තිබුනා. නමුත් එහි පතොරොම් තිබුනේ නැහැ. ඇත්ත වශයෙන්ම චේ නිරායුධාවයි සිටියේ." 

 

"මම තීරණය කළා චේ සහ අනික් ගරිල්ලා භටයාව ලඟම තිබු පාසැල වෙත රැගෙන ගොස් සිර කර තබන්නට. මම අණ කළා මගේ හමුදා භටයින් දෙදෙනාට චේට උදව් කරන ලෙස ඇවිදින්නට. “නැහැ කැප්ටන්. මට තනියම යන්න පුළුවන්” චේ නැවතත් පහත් හඬින් ප්‍රකාශ කළා."

මම චේ සහ විලී සමග ලා හිගුරා පාසල දෙසට පැමිණුනා. ඒ වෙලාවේදී මගේ හිතට ආවේ එකම අදහසක්. ඒ දැන් සියල්ල අවසානයි.  මාස ගණනාවක අපේ මෙහෙයුම් වලින් පසු අපිට ගෙදර යන්න පුළුවන් යන්න. 

"චේ මානසිකව බොහොම පහල මට්ටමක හිටියේ. යටත් වෙලා හිටියේ. ඔහු දැනගෙන සිටියා මේ අවසානය බව. ඔහුගේ ගරිල්ලා භටයින් 5 දෙනෙක් මිය ගොස් තිබුනා." 

It's over ! සියල්ල අවසානයි !

ටික දුරක් යද්දී මහන්සියට අපි නතර වුනා. ඒ වෙලාවේදී මම අණ කළා මගේ හමුදා සාමාජිකයින්ට චේ සහ විලී ගේ අත් පා බැඳ දමන ලෙසට. ඒ වෙලාවේ චේ දැක්කා මම අනිකුත් භටයන්ට කතා කරලා ප්‍රදේශයේ ආරක්ෂාව තර කරන්නට උපදෙස් දෙන බව. 

ඔහු සෙමින් මට පැවසුවා. “බය වෙන්න එපා කැප්ටන්. මේ තමයි අවසානය. ඔක්කොම ඉවරයි.”


නමුත් මා ඔහුට පැවසුවා “ඔබට ඔක්කොම ඉවර වෙන්න පුළුවන්. ඔබ දැන් හිරකරුවෙක්. නමුත් සමහර විට තවත් ගරිල්ලා භටයන් ඇති මේ කැලෑව තුල. ඒ නිසා මා ආරක්ෂාව තර කරනවා.”

කොයි තරම් පහසු විදිහකටද චේ යටත් වුනේ. මට විශ්වාශ කරන්නත් අමාරු වුනා. මට දැනුනේ ගරිල්ලා භටයන්ට විරුද්ධව අපේ මුළු සටනම ඉවරයි වගේ. චේ අත් අඩංගුවට පත් වීමෙන් ඒ සටන් ඔක්කොම නතර වේවි. බොලීවියාව සහ චේ ගේ පෞරුෂත්වය අතර තිබුණු සටනේ අවසානය මෙයයි මට හැඟුනා. 

චේ ගුවේරා ගිය පාරේ - On the Trail of Che Guevara

සැන්ටා කෘස් නගරයේ සිට කි,මී 300කටත් වඩා දුරකින් තමයි චේ ගුවේරා අත් අඩංගුවට ගත් ලා හිගුරා (ස්පාඤ්ඤ භාෂාවෙන් ලයිගුරා) ගම්මානය පිහිටා තිබෙන්නේ. කි.මී. 200ක් පමණ යන විට තාර දැමු පාර අවසන් වෙනවා. එතනින් එහාට ඇත්තේ ඝන වනාන්තරය. 

චේ ගුවේරා ගිය පාරේ - On the Trail of Che Guevara

 පැය 3 කටත් වඩා අධික කාලයක් අපේ වාහනය මේ ඝන කැලෑව තුල ධාවනය වුනා. වාසනාවකට වගේ අපිට තිබුනේ 4ෂ4 ජීප් රථයක්. ඒ රථය නොතිබෙන්නට අපිට සමහර ස්ථාන පසු කර යන්නට තිබුණු ඉඩ කඩ ගොඩාක් අඩුයි. 

චේ ගුවේරා ගිය පාරේ - On the Trail of Che Guevara

මරියා එර්තෙස්, වලෙග්‍රන්දා චේ ගුවේරා  මධ්‍යස්ථානයේ සේවය කරන කාන්තාවක්. ඇය චේ ගුවේරා හා සම්බන්ධ ස්ථාන සහ ඉතිහාසය හොඳින් හදාරා ඇති නිසා  මා ඇගෙන් ඉල්ලා සිටියා ලා හිගුරා ගම්මානයට යන ගමනට මා සමග එක් වන ලෙස.                                         

චේ ගුවේරා ගිය පාරේ - On the Trail of Che Guevara

කි.මී 300ක් පැමිණි පසු තව දුරටත් ඝන කැලෑව ඇතුලට පයින්. කි.මී. 3ක පමණ ප්‍රමාණයක් මේ ආකාරයෙන් කන්ද මුදුනේ සිට පහලට බහින්න සිදු වුනා. අවසානයේදී අපි පැමිණුනේ හරියටම එදා 1967 වසරේ ඔක්තෝබර් මාසයේ 8 වැනිදා ගැරී ප්‍රාඩෝ ගේ සෙබළුන් විසින් චේ ගුවේරා අත් අඩංගුවට ගත් ස්ථානයට.

චේ ගුවේරා ගිය පාරේ - On the Trail of Che Guevara

මේ තමයි ඒ ස්ථානය. බොලීවියානු සෙබළුන් වෙඩි තබත්දී චේ ගුවේරා මේ ගලට මුවා වෙලා ඉඳලා අවසානයේදී තමයි අත් අඩංගුවට පත් වුනේ.  එල් චුරෝ නමැති මේ ස්ථානය සිහිවීම සඳහා චේ ගුවේරා ගේ මුහුණ සහිත රතු තරුවක් ගලේ සායම් කොට තිබෙනවා. ​

ජායාරුප අනුග්‍රහය - Guest House Casa Del Telegrafista - La Higuera-Bolivia

මේ තමයි ඒ ස්ථානය මීට වසර 50කට පෙර දිස්වූ අන්දම. 

​ගැරී ප්‍රාඩෝ සඳහන් කරන ලා හිගුරා පාසැල - චේ ගුවේරා අත් අඩංගුවට ගත් පසු රඳවා තැබූ ස්ථානය සොයා තව දුරටත් මම ගමන් කළා. මේ පාසල පිහිටා තිබෙන්නේ අත් අඩංගුවට ගත් ස්ථානයේ සිට කි.මී 4ක් පමණ දුරකින්. 

චේ ගුවේරා ගිය පාරේ - On the Trail of Che Guevara

මේ තමයි ලා හිගුරා ගම්මානයේ පාසල් කාමරය එදා දිස්වූ ආකාරය. චේ ගුවේරා අත් අඩංගුවට ගත් දිනයේ .

ජායාරුප අනුග්‍රහය - Gral. Div. (r) Gary Prado Salmon-La Guerrilla Inmolada

චේ ගුවේරා ගිය පාරේ - On the Trail of Che Guevara

මේ වසර 50කට පසු ඒ පාසැල් කාමරය අද දිස් වන ආකාරය. 

චේ ගුවේරා ගිය පාරේ - On the Trail of Che Guevara

​1967 ඔක්තෝබර් මස 7 වැනිදා චේ ගුවේරා අත් අඩංගුවට ගත් පසු ගැරී ප්‍රාඩෝ ඇතුළු හමුදා කණ්ඩායම සමග ලා හිගුරා පාසැල්රු කාමරය ඉදිරිපිට-ගැරී ප්‍රාඩෝ සිටින්නේ ජායාරුපයේ දකුණු කෙළවර - ජායාරුප අනුග්‍රහය - Gral. Div. (r) Gary Prado Salmon-La Guerrilla Inmolada

"I have Papa and Willy. Papa slightly wounded. Combat goes on." Captain Prado

"චේ සමග ලා හිගුරා ගම්මානයේ කුඩා පාසල වෙත පැමිණි මා මගේ හමුදා භටයින් ලවා වලෙග්‍රන්දා ප්‍රධාන හමුදා මධ්‍යස්ථානය වෙත පණිවිඩයක් යැව්වා." ගැරී ප්‍රාඩෝ තව දුරටත් විස්තර කරමින් පවසනවා. 


“I have Papa and Willy. Papa slightly wounded. Combat goes on. Captain Prado.”


"විනාඩි කිහිපයකින් මට ලැබුණු පණිවිඩයෙන් පැවසුනේ චේ ගුවේරා අත් අඩංගුවට ගැනීම නැවත වාරයක් සනාත කරන ලෙස. මා ඔවුන්ට දන්වා සිටියේ අත් අඩංගුවේ සිටින්නේ චේ ගුවේරා බව තමාට හොඳටම විශ්වාශ බවයි." 

චේ ගුවේරා ගිය පාරේ - On the Trail of Che Guevara
චේ ගුවේරා ගිය පාරේ - On the Trail of Che Guevara

 ලා හිගුරා ගම්මානයේ පාසල් කාමරය තුල චේ ගුවේරා සිටි අන්දම 

ජායාරුප අනුග්‍රහය - Gral. Div. (r) Gary Prado Salmon-La Guerrilla Inmolada

"හැබැයි එදා රෑ මට නින්ද ගියේ නැහැ. රෑ මම නැවත වතාවක් ලා හිගුරා පාසල වෙත ගියා සිර කරුවන් බලන්නට.  මම ඇතුල් වුනා චේ සිටි කාමරයට. මම දුටුවා ඒ කාමරයේ තිබුණු කුඩා පුටුවක ඔහු ඉඳගෙන සිටියා. එකම එක ඉටි පන්දමක් පමණක් කාමරයේ දැල්වෙමින් තිබුනා. චේ ගුවේරාගේ ඇස් පියවී තිබුනේ." 


"මා පැමිණෙන බව හැඟුණු චේ ගේ දෙනෙත් විවර වුනා. මා ළඟ අස්ටෝරියා වර්ගයේ සිගරට් පැකට්ටුවක් තිබුනා. කතා කිරීමට හොඳ අවස්ථාවක් වගේ මට හැඟුණු නිසා මා ඔහුට සිගරට් කිහිපයක් ගැනීමට අවසර දුන්නා. සිගරට් දෙකක් තම අතින් කඩා පරණ දුම් පයිප්පයකට දමා චේ දුම් උරන්නට පටන් ගත්තා." 

චේ ගුවේරා ගිය පාරේ - On the Trail of Che Guevara

මේ ඒ පාසල් කාමරය ඇතුලත අද දිස්වන ආකාරය. චේ ගුවේරා මරා දමන්නට පෙර අවසාන වරට වාඩිවී සිටි පුටුව අදත් ඒ අකාරයෙන්ම දක්නට ලැබෙනවා. දකුණු පැත්තෙන් පෙනෙන්නේ එදා මේ පාසල් කාමරයට තිබුණ ඇතුල්වීමේ දොර. එයත් ඔවුන් ඒ ආකාරයෙන්ම ආරක්ෂා කර ගෙන තිබෙනවා. 

චේ ගුවේරා ගිය පාරේ - On the Trail of Che Guevara

මේ පාසැල අද කෞතුකාගාරයක් ලෙස බොලීවියානු රජයෙන් නම් කර තිබෙනවා. මේ ලා හිගුරා ගම්මානයේ ජීවත් වෙන්නේ පවුල් කිහිපයක් පමණයි. ඇත්තටම කියනවානම් පවුල් 20කට වඩා අඩු ප්‍රමාණයක්.  කෞතුකාගාරයේ ආරක්ෂාව සහ භාරකාරත්වය මසකට එක් පවුලක් වෙතට භාර දී තිබෙනවා. කෞතුකාගාරයෙන් ලැබෙන ආදායම ඒ පවුලේ නඩත්තුව සඳහා යෙදෙවෙනවා.  මේ ජායාරුපයේ සිටින්නේ කෞතුකාගාරයේ භාරකාරිනිය.

චේ ගුවේරා ගිය පාරේ - On the Trail of Che Guevara
චේ ගුවේරා ගිය පාරේ - On the Trail of Che Guevara

​සංචාරකයින් දකින්නට ඇත්තෙම නැහැ ලා හිගුරා ගම්මානයේ. මා පැමිණි දිනයේ වෙන එකදු පුද්ගලයෙක් වත් මා දුටුවේ නැහැ. මුළු ගම්මානයේම මා දුටුවේ පුද්ගලයින් 3 දෙනෙක් පමණයි. චේ ගුවේරා මේ ගම්මානයේදී මරුමුවට පත් නොවුනානම් සමහර විට බොලීවියානු සිතියමේ පවා ලා හිගුවෙරා  ගම්මානයේ නම සඳහන් නොවන්නට ඉඩ තිබුනා. 

 නැවතත් යොමු වෙමු ගැරී ප්‍රාඩෝ වෙතට.  ඔහු තව දුරටත් කරුණු පැහැදිලි කළා.  ඔහු සඳහන් කරන පරිදි චේ ගුවේරා සමග සාමකාමී ලෙස කතා බස් කිරීමට මෙය කදිම අවස්ථාවක් වුනා.

 

“කොහොමද ඔබට දැන් ?”

“හොඳයි. ඔබේ ලුතිනන් මගේ තුවාලයට බැන්ඩේජ් එකක් දැම්මා. එයට ස්තුතියි.”

“අපිට දොස්තර කෙනෙක් මෙතන නැහැ. හැබැයි හෙට උදේට වලෙග්‍රන්දා වලින් පැමිණෙන හෙලිකොප්ටරයෙන් ඔබට එහාට යන්නට පුළුවන්.”

“ඔව් ඔව් මම හිතෙනවා ඒ අය මම එනකන් බලාගෙන ඉන්නවා කියලා” චේ ගුවේරා සිනාසෙමින් කිව්වා.

“තවත් මොනවත් ඔබට අවශ්‍යද? බ්ලැන්කට් එකක් මම එවන්නද?”

“පුලුවන්නම් හොඳයි. තවත් කාරණයක් තිබෙනවා කැප්ටන් කියන්න. මා ගාව අත් ඔරලෝසු දෙකක් තිබුනා. එකක් මගේ සහ අනික් ඔරලෝසුව මීට මාස 2කට පෙර මරණයට පත් වුනු ටුමා නම් ගරිල්ලා භටයෙකුගේ. මාව අත් අඩංගුවට ගන්න කොට ඔබගේ සොල්දාදුවන් ඒවා මගෙන් උදුරා ගත්තා.”

ඔහුගේ අතේ බැඳී ඔරලෝසුව අවසාන වරට කියුබාවෙන් පිට වෙත්දී ෆිදෙල් කැස්ත්‍රෝ විසින් තෑග්ගක් වශයෙන් ලබා දුන් බව චේ පැවසුවා. 


මා දැන සිටියා චේ අත් අඩංගුවට ගත් හමුදා භටයින් කවුද කියා. පාසැල් කාමරයෙන් පිටවූ මම වහාම ඒ හමුදා භටයින් කැඳවා ඔවුන් ගෙන් අත් ඔරලෝසු 2 ලබා ගෙන නැවත චේ හට භාර දුන්නා. 


“නැහැ. දැන් ආයිත් සැරයක් ඔරලෝසු දා ගෙන ඉන්න එක හොඳ නැහැ. මම ඔබෙන් උදව්වක් ඉල්ලනවා. ඔබට පුළුවන් නම් මේවා තියාගෙන මාගේ මිනිසුන් වෙත යවන බවට පොරොන්දු වෙනවාද?”


මට එක් වරට පිළිතුරක් දෙන්න බැරිවුනා. හැබැයි මම දැන හිටිය හෙට දිනයේ චේ ව වලෙග්‍රන්දා වෙත රැගෙන ගිය විට එහි හමුදා භටයන් මේවා ගන්න බව. 


“මේ දෙකෙන් ඔබේ ඔරලෝසුව මොකක්ද?”


බිමින් ගල් කැටයක් ගත් චේ එක් ඔරලෝසුවක් පිටිපස සුරා සටහනක් ඇති කළා.


“මේ මගේ ඔරලෝසුව”

© Sanchara - Rokhan Direkz

ඇයි චේ ගුවේරාව මැරුවේ? කවුද චේ ගුවේරාව මැරුවේ? ඇයි සී.අයි.ඒ. නියෝජිතයෙක් පැමිණුනේ....

ඇයි චේ ගුවේරා ගේ දෑත් කපා දැමුවේ? චේ ගුවේරාගේ සිරුර ප්‍රදර්ශනය කල වලෙග්‍රන්දා නගරයට ගිය ගමන ...

​ෆිදෙල් කැස්ත්‍රෝ චේ ගුවේරාව අවසාන මොහොතේ අත් හැරියාද?  ගැරී ප්‍රාඩෝ ගේ සාක්කිය.............

චේ ගුවේරා ගිය පාරේ - On the Trail of Che Guevara
චේ ගුවේරා ගිය පාරේ - On the Trail of Che Guevara

Special Thanks - විශේෂ ස්තුතිය ;

* Gral. Div. (r) Gary Prado Salmon-Bolivia

* Gary Prado-Bolivia

* Marcos-Amboro Tours-Bolivia

* Maria Esther- Bolivia

* Thissa Gunathilake-Sri Lanka

* Anne Mayanthi Gunadasa-Bolivia

Rohan Direkz 

​සංචාරය කලේ 2018 මැයි 12-22 

rohandx@hotmail.com

ඔබේ අදහස්
තවත් කියවන්න
bottom of page